Ishonchdan sheriklikka: Pokiston bilan yangi hamkorlik formati

O‘zbekiston Respublikasi Prezidenti Shavkat Mirziyoyevning Pokiston Islom Respublikasiga amalga oshirgan davlat tashrifi ikki mamlakat o‘rtasidagi munosabatlar tarixida yangi sahifa ochdi. Bu tashrif nafaqat diplomatik protokol doirasidagi uchrashuv, balki o‘zaro ishonch, strategik sheriklik va umumiy kelajakka qaratilgan qat’iy irodaning yorqin ifodasi sifatida tarixga muhrlandi.

So‘nggi yillarda O‘zbekiston tashqi siyosatida ochiqlik, o‘zaro manfaat va amaliy natijadorlik tamoyillari ustuvor ahamiyat kasb etmoqda. Pokistonga amalga oshirilgan mazkur tashrif aynan shu yondashuvning mantiqiy davomi bo‘lib, Markaziy va Janubiy Osiyoni bog‘lovchi muhim geosiyosiy ko‘prik sifatida O‘zbekistonning nufuzini yanada mustahkamladi.

Oliy darajadagi muzokaralar davomida siyosiy muloqotni chuqurlashtirish, savdo-iqtisodiy hamkorlik hajmini oshirish, transport-logistika yo‘nalishlarini rivojlantirish, sanoat kooperatsiyasi, qishloq xo‘jaligi, energetika va ta’lim sohalarida o‘zaro hamkorlikni kengaytirish bo‘yicha muhim kelishuvlarga erishildi. Ayniqsa, mintaqa uchun strategik ahamiyatga ega bo‘lgan tranzit yo‘laklari va xalqaro savdo yo‘nalishlari bo‘yicha ilgari surilgan tashabbuslar kelajakda butun mintaqaning iqtisodiy manzarasini o‘zgartirishi shubhasiz.

Tashrif doirasida erishilgan kelishuvlar faqat hujjatlarda emas, balki aniq loyihalar, amaliy rejalar va o‘zaro mas’uliyatga asoslangan hamkorlik mexanizmida o‘z ifodasini topdi. Bu esa ikki davlat munosabatlari rasmiy muloqotdan amaliy sheriklik darajasiga ko‘tarilganini yaqqol namoyon etdi.

E’tiborli jihati shundaki, O‘zbekiston va Pokistonni nafaqat iqtisodiy manfaatlar, balki tarixiy yaqinlik, ma’naviy mushtaraklik va umumiy qadriyatlar ham bog‘lab turadi. Mazkur tashrif ana shu ruhiy yaqinlikni yanada mustahkamlab, xalqlar o‘rtasidagi ishonch va do‘stlikni yangi pog‘onaga olib chiqdi.

Shavkat Mirziyoyevning ushbu tarixiy tashrifi O‘zbekistonning xalqaro maydondagi faol, tashabbuskor va ishonchli davlat sifatidagi qiyofasini yana bir bor tasdiqladi. Bu safar — milliy manfaatlarga tayangan, uzoqni ko‘zlagan va xalq farovonligiga xizmat qiluvchi tashqi siyosatning amaliy natijasidir.

Bugun faxr bilan aytish mumkin: O‘zbekiston o‘z so‘zi va tashabbusi bilan mintaqada barqarorlik, taraqqiyot va o‘zaro hamkorlik yo‘lida ishonchli yetakchiga aylanib bormoqda. Pokistonga qilingan mazkur tashrif esa ana shu yo‘ldagi muhim va tarixiy qadam sifatida mamlakatimiz solnomasida munosib o‘rin egallaydi.

Baxtiyor XOLMIRZAYEV
San’at va sport fakulteti o‘qituvchisi